Дзяніс Мельянцоў

Дзіўна гучыць, праўда? Асабліва на фоне нядаўніх заяваў беларускага МЗС пра забарону беларускім вайскоўцам удзельнічаць у баявых дзеяннях за мяжой. Пра гэта я падрабязна пісаў у сваім папярэднім каментары. Зараз жа пагаворым пра беларускіх міратворцаў у Ліване.

Паводле словаў намесніка начальніка Генштаба Ўладзіміра Сулімава Беларусь атрымала афіцыйны запыт ад ААН на ўдзел беларускага кантынгенту ў міратворчай аперацыі ў Ліване. Менавіта пра гэта гаварылі тры месяцы таму міністр Мартынаў і Генсек Пан Гі Мун.

Трэба сказаць, што ўжо некалькі год беларускае вайсковае кіраўніцтва прыглядаецца, куды б даслаць сваіх людзей для атрымання досведу міжнародных міратворчых аперацыяў. Справа ў тым, яшчэ ў 2006 годзе ў беларускім войску была створана  міратворчая рота, ваеннаслужачыя якой ўжо паспелі паўдзельнічаць у вайсковых вучэннях пад эгідай NATO ў Малдове і Албаніі, і, нават, сталі пераможцамі міратворчых спаборніцтваў у 2007 годзе. Аднак да гэтае пары міратворчая рота не мела досведу ўдзелу ў сапраўдных міратворчых аперацыях. А тут такая нагода.

Што ж будуць рабіць нашыя вайскоўцы ў Ліване? Перш за ўсё трэба адзначыць, што запыт з ААН прыйшоў на медыцынскі персанал і на штабных афіцэраў. Так што пра баявыя дзеянні гаворка не вядзецца. Па-другое, шматнацыянальны міратворчы кантынгент у Ліване баёў не вядзе, а дапамагае ліванскаму ўраду ахоўваць межы, канваюе гуманітарныя грузы, займаецца кантрольнымі функцыямі. Тым не менш, без ахвяраў не абыходзіцца – з 1978 года Часовыя Сілы ААН у Ліване страцілі забітымі 269 вайскоўцаў. Так што сякі-такі досвед правядзення міратворчай аперацыі ва ўмовах набліжаных да баявых беларускія вайскоўцы атрымаць змогуць.

Пакуль невядома, колькі вайскоўцаў з міратворчай роты будзе задзейнічана і калі яны будуць адпраўлены на Блізкі Ўсход. Але, мяркуючы па ўсім, рашэнне пранятае і чакае свайго выканання. Дарэчы, не так даўно Міністэрства абароны размясціла ў Інтэрнэце аб’яву пра вакансіі ў міратворчую роту: патрабуецца намеснік камандзіра ўзвода, кулямётчык, наводчык, стралок, сапёр-стралок, санітар-стралок, старшы кіроўца і снайпер. Можа хто жадае змяніць працу?